O futuro do Real Mosteiro de Oia: historia, arquitectura e sostibilidade. Un proxecto sen precedentes, preséntase en Vigo
Nun evento que reuniu a autoridades, figuras destacadas do ámbito cultural e empresarial, así como un numeroso público, presentouse en Vigo o ambicioso proxecto de restauración, rehabilitación e ampliación do Real Mosteiro de Santa María de Oia. Enmarcada nas actividades paralelas á exposición “Un Mosteiro, un mar de historia(s)”, organizada pola Fundación Bretal, a presentación tivo lugar no Auditorio da Sede Afundación en Vigo e contou coa participación de Santiago Pintos, de Rodríguez + Pintos Arquitectos; Sarah Barbará, coordinadora do proxecto do Real Mosteiro de Oia, Xoán Martínez, director do Real Mosteiro de Oia, e Lara Graña, redactora Xefe do Faro de Vigo.
Este proxecto, liderado por GRUPO MARE (antes Vasco Galega), un grupo galego cunha forte proxección internacional, marca unha nova etapa na historia do Mosteiro tras 20 anos de traballo.
Unha benvida con visión global
Xoán Martínez abriu o evento cunha cálida benvida, incidindo na vertente social e o carácter internacional do grupo e o proxecto. O compromiso social da empresa integra iniciativas asociadas ao deporte, a educación a investigación médica; destacando a importancia do proxecto do Mosteiro de Oia como símbolo da implicación co territorio. O carácter global foi reivindicado non só a través da presenza do grupo en catro continentes, senón na relación que o proxecto ten con institucións europeas, como o Consello de Europa, e con grupos hostaleiros globais de primeiro nivel que resultan claves para asegurar a viabilidade e sustentabilidade a longo prazo do mosteiro unha vez recuperado.
Un proxecto de rehabilitación clave para Galicia
O proxecto presentado supón un investimento total superior aos 25 millóns de euros, e recibiu axudas da Xunta de Galicia por un importe de 4 millóns de euros asociados a ese investimento. Esta primeira cifra reflicte a magnitude dunha restauración que converterá o Mosteiro de Oia nun hotel de cinco estrelas cun forte compoñente cultural. Incluirá 74 habitacións, un spa, así como amplos xardíns e zonas de esparexemento. Esta intervención garantirá a viabilidade e sustentabilidade do monumento e o seu futuro a longo prazo, aliñando o seu desenvolvemento coas necesidades do turismo de calidade e a preservación do patrimonio.
Trátase do maior investimento da historia do Concello de Oia, e unha dos maiores investimentos privados en patrimonio en Galicia dos últimos tempos.
Xoán Martínez agradeceu o apoio da Xunta de Galicia, e en especial ao presidente Alfonso Rueda, cuxo apoio foi determinante dada a complexidade burocrática asociada ao proxecto.
Actualmente, estase á espera de recibir o único informe pendente que depende neste caso de Costas do Estado. Unha vez recíbase, poderase solicitar a Licenza de Obra ao Concello de Oia, e así poder iniciar os traballos. Neste sentido tamén se agradeceu a colaboración do Concello, para axilizar ao máximo esta licenza grazas a encontros de traballo xa mantidos.
A obtención do informe de Costas do Estado e a inmediata obtención posterior da Licenza de Obra, son determinantes para finalizar as obras de rehabilitación no tempo que esixe a subvención concedida.
Un enfoque sostible e cultural
Sarah Barbará, comisaria da exposición "Un Mosteiro, un mar de historia(s)" e coordinadora do proxecto do Mosteiro de Oia, subliñou a importancia da sostibilidade no proxecto, non só en termos ambientais senón tamén desde unha perspectiva patrimonial e social. Sarah Barbará lembrou as máis de 100 actividades culturais realizadas no Mosteiro nos últimos anos, que atraeron a máis de 35.000 visitantes.
Pola súa banda, Santiago Pintos, socio de Rodríguez + Pintos Arquitectos, explicou os detalles técnicos do proxecto, que inclúe a ampliación do Mosteiro con novas construcións respectuosas coa contorna e o uso de tecnoloxías avanzadas como o BIM para o seu deseño e execución. Santiago Pintos destacou que esta intervención representa unha oportunidade única para intervir nun patrimonio vivo, en constante evolución desde a súa fundación no século XII. Incluíu a proxección de infografías e un vídeo que permitiu aos asistentes visualizar como será a transformación do Mosteiro tras a intervención prevista.
Ao finalizar, Xoán Martínez dialogou con Lara Graña, redactora xefe de Faro de Vigo, abordando os desafíos enfrontados nos 20 anos de traballo, así como a visión de futuro. Tamén se tivo a oportunidade de dedicar unhas palabras a quen foi parte fundamental deste proxecto, desde os veciños do municipio ata membros do equipo, que xa non están presentes, destacando o carácter humano e colectivo desta iniciativa.
Un legado que transcende fronteiras
O evento concluíu cunha intervención do presidente da Xunta de Galicia, Alfonso Rueda, quen destacou o valor histórico do Real Mosteiro de Oia e reiterou o compromiso do goberno rexional coa súa conservación e promoción como destino cultural de referencia.
O proxecto do Real Mosteiro de Oia non só representa unha intervención arquitectónica de gran envergadura, senón tamén un exemplo de como o patrimonio pode ser un motor para o desenvolvemento económico e social do territorio. Coa súa posta en marcha, e coa participación de referentes internacionais en sintonía, Galicia reafirma a súa aposta pola preservación da súa historia e cultura, abrindo as portas a un futuro prometedor para o monumento e a súa contorna.