Fundación Bretal colabora con Bicos de Papel a través de “A Figueira Máxica”
En Fundación Bretal cremos que a cultura e a saúde poden ir da man. Por iso, estamos moi orgullosos de anunciar a nosa colaboración coa asociación Bicos de Papel, apoiando ás familias de nenos e nenas hospitalizados na Unidade de Oncoloxía Pediátrica do Hospital Álvaro Cunqueiro de Vigo.
Esta iniciativa enmárcase dentro do proxecto editorial “A Figueira Máxica”, o primeiro libro infantil da nosa editorial Serra da Groba, escrito por Dalia González Puído. Parte das vendas deste libro destinarase directamente a Bicos de Papel, reforzando o seu labor de acompañamento e apoio ás familias durante momentos difíciles.
Bicos de Papel traballa incansablemente para levar sorrisos, entretemento e apoio emocional aos nenos hospitalizados e ás súas familias. Para Fundación Bretal é unha honra contribuír a este labor a través da cultura.
Sobre Bicos de Papel
Bicos de Papel é unha asociación dedicada a acompañar a nenos e nenas hospitalizados e ás súas familias, especialmente na Unidade de Oncoloxía Pediátrica do Hospital Álvaro Cunqueiro de Vigo. O seu labor inclúe:
- Acompañamento emocional: apoiando aos pequenos pacientes e ás súas familias durante a hospitalización.
- Actividades lúdicas e culturais: fomentando a imaxinación, a lectura e o entretemento para que os nenos gocen de momentos de alegría a pesar da enfermidade.
- Redes de apoio: conectando a familias para compartir experiencias e recursos útiles durante o tratamento.
Sobre o libro
“A Figueira Máxica” conta a historia de Artai, un neno que, tras unha promesa á súa avoa, embárcase nunha aventura xunto a Briana, descubrindo os segredos do Mosteiro de Santa María de Oia. Con mariñeiros, monxes e piratas como compañeiros de viaxe, a historia combina fantasía e patrimonio, converténdose nun vehículo perfecto para promover valores como a amizade, a valentía e a imaxinación
Cómo colaborar
Adquirindo un exemplar de “A Figueira Máxica” contribúes directamente a Bicos de Papel e ao benestar de nenos hospitalizados.
- Prezo: 9,95€
- Onde conseguilo: Podes reservar un exemplar poñéndote en contacto con atencion@tiendafundacionbretal.com
Equipo detrás do libro
- Dalia González Puído, autora, inspirada polo Real Mosteiro de Oia.
- Sibila Leis, edición, deseño e maquetación.
- Carmen González, ilustracións que capturan a maxia do Mosteiro.
O libro estará dispoñible proximamente noutros puntos de venda e na web do Mosteiro, converténdose nunha oportunidade de unir cultura e solidariedade.